Heb 1 | LEU | STEP | Lana maana yaan xaves e pana maana vilaana xaves la mu yaan ti kavai a Piran fo ferawai xe sina mu butaara la ngusuna mu rabuna ina kuus fatuxai.

aYng 2:7

b1 Xks 17:13, 2 Sml 7:14

cVpt 32:43

dYng 104:4

eYng 45:6-7

fYng 102:25-27

gYng 110:1

Hebrews 1

A Namkaian Se Krais A Mo Pelalava Marasaxa

A Ferawaian Sina Piran I Taxa Waan Lana Natuna

1 Lana maana yaan xaves e pana maana vilaana xaves la mu yaan ti kavai a Piran fo ferawai xe sina mu butaara la ngusuna mu rabuna ina kuus fatuxai. 2 Taasaxa lana mu yaan aanabe' xo taxa falet, nane fo ferawai xuvul pataara la ngusu Natuna. Se Natuna aave mon, a maana mo xapiak la xavala e la finavata fo vesanan pana gutan sina Piran. E a Piran a siak fatie vaxa xena tavaie pana maana mo xapiak. 3 Nane sang mon i taxa faxalit a miridingan sina Piran; a maana mo xapiak sina e maana mo sina Piran ri fexaxaas. E pana gutan ina ferawaian sina nane taxa lo tao fanei fatateak a maana mo aava nane fo vesane. E lamina yaan nane fo siak a lamon tapinan sena vilaana saat xana mu rabuna xapiak, nane laak xe la xunavata e fe nai la pamuaan sina Piran pana Maana Gutan Xapiak.

A Isi Natuna A Pelalava Sena Mu Angelo

4 Na Natuna a pelalava seri mu angelo malaan sena isin aava Piran fo fa'isine pana, a molava seri. Xe sise' ta angelo ve a Piran fo xuuse:

“Nano, no Lak Tomexaan siak.
Tanin nenia, ne Tamaam.” ^a
5 E a Piran a pife ferawai sena saxa angelo o:

“Nenia, ne taa Tamana e nane, i taa Natuk.” ^b
6 Piau! Taasaxa layaan a Piran rao i feng a Lak Tuaan sina xe nabe' la xavala nane ferawai malaan:

“A maana angelo sina Piran ri taa nanguse.” ^c
7 E sena mu angelo a Piran fo kuus malaan:

“A mu angelo sina Piran ve, ri mu sisiak sina e ri fexaxaas malaan sena reref, ri malaan sena radaam ina fata.” ^d
8 Taasaxa se Natuna naboxo, a Piran fo kuus:

“A fatataganan siim Piran, i taa waan vulai xe vulai.
No taa paamuian a mu rabuna siim pana roxoyan.
9 No fuuna vubuxan a maana mo xapiak aava roxo
e no baian a maana mo xapiak aava saat.
E voxo Piran, a Piran siim, fo siak fati nano
e nane tavai nano pana faamamaasan
senaso nane fo bur nano pana ngavuk aava pelalava sena ngavuk aava nane tavai a xasanofuna pana.” ^e
10 E nane kuus fulaa:

“Nano Memai, la tangpat no fo vesan a xavala e maana mo xapiak xuluna
e pana maam no fo vesan a finavata e maana mo xapiak lana.
11 E a maana mo aave ri tafe malit, taasaxa nano xo, no taa waan.
Nari, ri tafe xavai malaan sena mu marapi.
12 Nano Piran, no taa pulum nari malaan sena marapi xavai o
no taa xul nari malaan sena mataa taa xul a marapi sina.
Taasaxa no pi xuxul, no taxa waan fatak vulai e
a toyan siim i taa pife taxapus.” ^f
13 A Piran pife xuus ta saxa angelo o:

“No maa nai nabe' faasilak la pamuaan iga
fefexaxaas sena yaan ne taa timin
a maana xaiyaas siim lapaana kaam malaan sena mo ina vaapaas.” ^g
14 A so ta mo ve mu angelo? Nari ve ri mu vovau aava ri sisiak sina Piran. E nane taxa feng nari xena xavang a mu rabuna aava ri taa siak a fakaaxupan sina.